Creidimid go gcuireann fostaithe ó gach carn den tsochaí fuinneamh in ionaid oibre, rud a spreagann polasaithe, cláir, agus seirbhísí níos freagrúla agus níos ionchuimsithí. Tá daoine ag croílár ár ngnó agus is í an tosaíocht atá againn lucht saothair den scoth ina bhfuil éagsúlacht le brath a earcú chun seirbhísí poiblí freagrúla agus ionchuimsitheacha a chur ar fáil do mhuintir na hÉireann.
Earcaítear formhór na ról Státseirbhíse agus Seirbhíse Poiblí trí chomórtais earcaíochta ina mbíonn líon mór iarratas (róil d’Oifigigh Chléireachais Shealadacha agus Bhuana, d’Oifigigh Feidhmiúcháin, do Ghardaí faoi Oiliúint, d’Oifigigh Phríosúin, do Thríú Rúnaithe, agus d’Oifigigh Riaracháin / róil do Chéimithe srl.). Maidir le poist Ghairmiúla, Theicniúla agus Bhainistíochta ar leith, déanaimid earcaíocht ar bhonn saincheaptha le linn na bliana.
Toisc go meallann comórtais earcaíochta do roinnt ról sa Státseirbhís agus sa tSeirbhís Phoiblí líon mór iarrthóirí, caithfidh iarrthóirí tabhairt faoi réimse de mheasúnuithe agus chleachtaí cuí le linn roinnt céimeanna roghnaithe. Bainimid úsáid as cur chuige atá á threorú ag éileamh, a chiallaíonn gur féidir go gcuirfí iarrthóirí ar aghaidh i ngrúpaí (.i. grúpaí d’iarrthóirí de réir a chéile) trí chéimeanna éagsúla measúnaithe ag amanna éagsúla, bunaithe ar líon na bhfolúntas a thagann chun cinn.
De ghnáth, cuirtear iarrthóirí a n-éiríonn leo ag an gcéim dheiridh den phróiseas ar ‘phainéal’, agus cuirtear in ord fiúntais iad (.i. in ord uimhriúil bunaithe ar a bhfeidhmíocht/marcanna ag an gcéim dheiridh). Roghnaítear iarrthóirí ón liosta seo in ord agus tairgtear post nó ‘ceapachán’ dóibh, de réir mar a thagann folúntais chun cinn.
Gnáthamlínte Earcaíochta
Braithfidh amlínte ar chúinsí éagsúla, lena n-áirítear (ach ní liosta iomlán é seo); líon na n-iarratas, líon na bhfolúntas, agus na hacmhainní atá ar fáil mar gheall ar líon na gcomórtas eile atá beo ag am áirithe. De ghnáth, maireann painéal thart ar 18-24 mhí agus is féidir go gcuirfí iarrthóirí faoi mheas am ar bith. Níl aon chinnteacht ann, áfach, go bhfaighidh iarrthóir tairiscint ar phost má chuirtear ar phainéal iad. Braitheann líon na ról a líontar ó phainéal ar líon na bhfolúntas ábhartha a thagann chun cinn le linn na tréimhse sin.
Uaireanta, maireann comórtais earcaíochta ina mbíonn líon mór iarratais do ghráid ghinearálta, m.sh. Oifigigh Chléireachais Shealadacha nó Bhuana, Oifigigh Feidhmiúcháin agus Oifigigh Riaracháin, roinnt míonna de bharr líon suntasach na n-iarratas a fhaightear de ghnáth. De ghnáth, téann iarrthóirí trí gach céim den phróiseas earcaíochta i ngrúpaí. Braithfidh uimhir do ghrúpa ar an marc a fuair tú, i gcomparáid le hiarrthóirí eile, ag an gcéim chuí sa chomórtas. Téann iarrthóirí a bhaineann marcanna níos airde amach ar aghaidh níos sciobtha.
Céimeanna inár bPróiseas Earcaíochta
Bíonn ár bpróiseas earcaíochta difriúil, ag brath ar an ról áirithe atá i gceist nó ar an gcineál comórtais. Bíonn roinnt céimeanna i gceist sa phróiseas earcaíochta, a ndéantar cur síos orthu thíos. Is fiú a thabhairt faoi deara nach mbaintear úsáid as na céimeanna céanna do gach ról. Ina theannta sin, tá an liosta thíos de na measúnuithe a d’fhéadfadh a bheith i gceist rangaithe, ach níl sé in ord croineolaíoch. Is féidir go mbeadh trialacha nó cleachtaí breise a aithníodh mar thrialacha nó chleachtaí cuí mar chuid den phróiseas earcaíochta.
Roimh gach céim den phróiseas earcaíochta, gheobhaidh tú cuireadh trí do chlár teachtaireachtaí ar publicjobs.ie. Nuair a ghlacann tú le cuireadh, is féidir go seolfar eolas, cáipéisí, nó ainmneacha na mBall den Bhord chugat roimh ré.
Bí ar an eolas nach bhfuil aon chinnteacht ann go dtabharfar tairiscint ar phost duit, cé go ndéanaimid iarracht gan iarrthóirí a chur ar phainéal mura bhfuil an t-éileamh ann, mar is féidir nach mbainfear d’áit ar an bpainéal amach má tá an t-éileamh níos ísle ná an t-éileamh a rabhthas ag súil leis.
Toisc go mbíonn ár bpróiseas earcaíochta casta agus toisc go dtéann roinnt grúpaí éagsúla ar aghaidh i rith thréimhse an chomórtais, go háirithe do chomórtais ina mbíonn líon mór iarratas, moltar go láidir d’iarrthóirí féachaint ar Leabhrán Eolais an Chomórtais do gach comórtas earcaíochta chun a dheimhniú go gcomhlíonann tú na riachtanais cháilitheachta sula gcuireann siad iarratas isteach nó sula dtugann siad faoi na céimeanna measúnaithe éagsúla.
Céim 1:
Iarratas
Céim 2:
Trialacha
Céim 3: Measúnú
Scileanna
Céim 4:
Agallamh
Céim 5: Seiceálacha réamhfhostaíochta
agus Imréitigh
Gluais Téarmaí
- Comórtais ina mbíonn Líon Mór Iarratas:Is comórtais iad seo ina mbíonn líon mór iarratas chun líon mór folúntas a líonadh.
- Leabhrán Eolais an Chomórtais Tá Leabhrán Eolais ar fáil do gach comórtas ina gcuirfear sonraí ar fáil faoin ról, faoin údarás fostaithe, faoi riachtanais cháilitheachta, faoin bpróiseas earcaíochta agus faoin luach saothair.
- An Próiseas Earcaíochta: Is é an próiseas earcaíochta an liosta de chéimeanna measúnaithe a ndéantar cur síos air i Leabhrán Eolais an Chomórtais.
- Incháilitheacht: Bíonn critéir cháilitheachta ar leith i bhfeidhm do gach ról, a ndéanfar cur síos orthu i Leabhrán Eolais an Chomórtais. Ní mór d’iarrthóirí gach critéar cáilitheachta a chomhlíonadh, m.sh. taithí ar leith a bheith acu nó cáilíocht ar leith, agus, mura gcomhlíonann siad na critéir, ní cheapfar iad. Is faoin iarrthóir atá sé a chinntiú go gcomhlíonann siad na riachtanais cháilitheachta a ndéantar cur síos orthu i Leabhrán Eolais an Chomórtais.
- Measúnuithe:Is éard atá i gceist le measúnuithe ná trialacha, agallaimh nó próisis éagsúla a mbaintear úsáid astu le linn an phróisis earcaíochta. Déantar cur síos ar gach céim a d’fhéadfadh a bheith i gceist sa mhír dar teideal Ár bPróiseas Earcaíochta.
- Céimeanna: Is iad na céimeanna na céimeanna agus na measúnuithe a bhaineann leis an bpróiseas earcaíochta ó chéim an iarratais go céim an cheapacháin. Tá sonraí faoi na céimeanna a d’fhéadfadh a bheith i gceist ar fáil thíos.
- Ábhar Eolais: Ag céimeanna éagsúla den phróiseas earcaíochta, seans go seolfar ábhar eolais chugat chun cabhrú leat tuiscint a fháil ar leagan amach na measúnuithe a bheidh le déanamh.
- Sraitheanna:Bíonn sraitheanna éagsúla i gceist i roinnt comórtas agus bíonn critéir cháilitheachta éagsúla acu. Mar shampla, tá comórtais ‘Oscailte’ ann (tá baill den phobal cáilithe chun iarratas a chur isteach, má chomhlíonann siad na critéir cháilitheachta eile) agus comórtais ‘Idir-Rannacha’ (níl cead ach ag Státseirbhísigh cur isteach orthu, má chomhlíonann siad na critéir cháilitheachta eile). Is féidir go ndéanfar iarrthóirí a mheas ag gach céim do shraith amháin nó do roinnt sraitheanna nó is féidir go ndéanfaidh iarrthóirí measúnuithe breise do shraith ar leith. Déanfar cur síos ar an bpróiseas earcaíochta atá i gceist i Leabhrán Eolais an Chomórtais.
- Grúpaí:Is grúpa d’iarrthóirí ar éirigh leo atá i gceist, a théann ar aghaidh go dtí an chéad chéim eile. Cuirfear i ngrúpa thú, bunaithe ar d’áit san ord fiúntais. Bíonn líon éagsúil daoine i ngrúpaí agus braitheann líon na ndaoine i ngrúpa ar na folúntais atá ar fáil nó atá tuartha ag am áirithe, mar bainimid úsáid as cur chuige atá á threorú ag éileamh.
- Áit san Ord Fiúntais: Is í d’áit san ord fiúntais d’áit laistigh den ghrúpa iarrthóirí ar éirigh leo ag céim áirithe. Mar shampla, má bhain tú na marcanna is airde amach i dtrialacha inniúlachta ag Céim 1, bheifeá sa chéad áit san ord fiúntais do Chéim 1. Tugtar na háiteanna is airde ar an bpainéal do na daoine a fhaigheann na marcanna is airde agus téann siadsan ar aghaidh chuig an gcéad chéim eile ar dtús.
- Cur chuige atá á threorú ag éileamh: Úsáidtear cur chuige i leith na hearcaíochta atá á threorú ag éileamh chun an líon iarrthóirí a fhaigheann cuireadh chuig céimeanna eile agus na hamlínte idir gach céim a shocrú. Braithfidh an líon daoine i ngrúpa agus an amlíne idir gach measúnú ar na folúntais atá ar fáil nó atá tuartha.
- Bord: Is iad na Baill den Bhord na daoine a dhéanfaidh measúnú ort nó a chuirfidh faoi agallamh thú ag gach céim den phróiseas earcaíochta.
- Baill an Bhoird: Is iad na Baill den Bhord na daoine a dhéanfaidh measúnú ort nó a chuirfidh faoi agallamh thú ag gach céim den phróiseas earcaíochta.
- Painéal: Is éard atá i gceist le painéal ná grúpa nó roinnt grúpaí d’iarrthóirí ar éirigh leo ag an gcéim dheiridh de phróiseas roghnaithe. Cuirtear iarrthóirí ar phainéal in ord fiúntais de ghnáth, bunaithe ar a bhfeidhmíocht/marcanna ag an gcéim dheiridh. Nuair a bhaintear d’áit san ord fiúntais amach ar an bpainéal, de réir mar a thagann folúntais chun cinn, rachaidh tú tríd an bpróiseas imréitigh sula dtairgtear post duit. Bí ar an eolas nach bhfuil aon chinnteacht ann go gceapfar thú nó go dtairgfear post duit má chuirtear ar phainéal thú.
- Imréiteach: Seiceálacha cáilitheachta agus cúlra deiridh a dhéantar sula gceaptar iarrthóir. Ag brath ar an oifig atá i gceist agus ar an gcineál oibre a bheidh i gceist, bíonn leibhéil éagsúla imréitigh i gceist. Féach ar na sonraí uilig sa mhír thíos maidir leis an imréiteach.
- Ceapachán: Nuair a chomhlíontar gach riachtanas imréitigh, seolfaidh an tSeirbhís um Cheapacháin Phoiblí fógra ceapacháin chugat agus sonraí faoi theagmhálaí AD d’fhostóra nua. Socróidh d’fhostóir nua gach gné den ionduchtú do do ról nua; níl baint ag an tSeirbhís um Cheapacháin Phoiblí leis seo ón gcéim seo ar aghaidh.
Céim 1: Iarratas
Agus iarratas á chur isteach agat ar Publicjobs.ie, líonfaidh tú foirm iarratais amach trí do chuntas Publicjobs.ie de ghnáth. Deartar an fhoirm iarratais chun cabhrú leat béim a leagan ar na scileanna agus ar an taithí atá agat atá ag teacht leis an gcur síos ar an bpost. Ní mór d’iarrthóirí an t-iarratas a chomhlíonadh, ag léiriú go gcomhlíonann siad na critéir cháilitheachta, sula gcuirtear faoi mheas iad don chéad chéim eile den phróiseas roghnaithe. Déantar cur síos thíos ar na céimeanna a d’fhéadfadh a bheith i gceist ag céim an iarratais:
- Foirm Iarratais: Beidh ort foirm iarratais struchtúrtha a líonadh isteach. Nuair atá riachtanais cháilitheachta i bhfeidhm, iarrfar ort fianaise a thabhairt le linn an phróisis mheasúnaithe. Maidir le roinnt ról sinsearach, is féidir go n-iarrfar ort CV a chur isteach
- Scrúdú Cáilitheachta: Is féidir go ndéanfar scrúdú ar d’iarratas ar dtús chun a chinntiú go gcomhlíontar na critéir cháilitheachta agus na critéir riachtanacha a ndéantar cur síos orthu i Leabhrán Eolais an Chomórtais. Do chomórtais áirithe, is féidir go ndeimhneofar critéir riachtanacha sula gcuirfear tús leis an gcéad chéim eile den chomórtas nó sula ndéantar ceapachán i bpost.
- Gearrliostú:Déanfaidh baill bhoird, ar saineolaithe iad, scrúdú ar na foirmeacha iarratais, ag baint úsáid as critéir ghearrliostaithe a socraíodh, bunaithe ar riachtanais an phoist, chun na hiarrthóirí sin a n-éireodh leo sa ról, dar leo, a aimsiú. Is féidir go n-áireofar sna critéir do ghearrliostú na critéir atá riachtanach chomh maith leis na critéir atá inmhianaithe agus inniúlachtaí/cumas don phost. Moltar duit, dá réir, mionchuntas cruinn a thabhairt ar do cháilíochtaí agus ar do thaithí ar d’fhoirm iarratais.
Céim 2: Tástáil
Úsáidtear trialacha ar líne go minic sa phróiseas earcaíochta do chuid mhaith de na poist a fhógraítear ar publicjobs.ie. Bíonn trialacha a dhéantar gan mhaoirseacht (trialacha ar líne) agus trialacha faoi mhaoirseacht (trialacha ar líne a ndéantar maoirseacht orthu trí ‘fheitheoireacht ar ó chian’) i gceist. Socrófar d’áit san Ord Fiúntais, nó do rangú, i gcomparáid le gach iarrthóir eile, bunaithe ar an marc a bhaineann tú amach ag an gcéim tástála. Is féidir iarrthóirí a chur faoi thriail do réimsí éagsúla scileanna, ag brath ar an bpost atá i gceist ach seo thíos na measúnuithe is coitianta a mbaintear úsáid astu:
- Ceistneoir Measúnaithe: Úsáidtear an measúnú ilrogha seo chun eolas a bhailiú faoi do scileanna, d’ábhair spéise, do roghanna, agus do fhreagraí maidir le cásanna a d’fhéadfadh a bheith i gceist sa ról. Sa mheasúnú seo, tabharfar sraith ráiteas duit agus iarrfar ort an chaoi a mbaineann gach ráiteas leat a chur in iúl. Ina theannta sin, beidh sraith ráiteas ann faoi na rudaí a mbeifeá ag súil leo sa ról, mar aon le liosta tascanna agus scileanna a bhaineann leis an ról, agus beidh ort tú féin a rátáil maidir leis na tascanna agus na scileanna sin. Is minic a bhaintear úsáid as measúnuithe de chineál seo do chomórtais ina mbíonn líon mór iarratas, m.sh. feachtais d’Oifigigh Chléireachas, d’Oifigigh Feidhmiúcháin agus do Ghardaí faoi Oiliúint.
- Measúnú Réasúnaíochta Briathartha: Úsáidtear an Measúnú Réasúnaíochta Briathartha chun measúnú a dhéanamh ar do chumas eolas ó shleachta scríofa nó ó théacsanna a thuiscint, a mheas agus anailís a dhéanamh air. Sa mheasúnú seo, tabharfar ráitis duit agus beidh ort úsáid a bhaint as eolas a chuirtear ar fáil chun iad a mheas agus iarrfar ort an freagra ceart a roghnú ó roghanna éagsúla de ghnáth.
- Measúnú Réasúnaíochta Uimhriúla: Úsáidtear an Measúnú Réasúnaíochta Uimhriúla chun measúnú a dhéanamh ar do chumas sonraí ábhartha a aimsiú agus tátail loighciúla a bhaint as eolas uimhriúil. Baintear úsáid as ceisteanna ilrogha de ghnáth
- Measúnú bunaithe ar Smaointeoireacht Loighciúil: Déanann an measúnú seo do chumas i dtaca le réasúnaíocht loighciúil nó theibí a mheas, .i. do chumas patrúin choitianta agus idirghaolmhaireachtaí a aithint chun teacht ar thátail loighciúla. Tá baint ag an triail seo le scileanna réitigh fadhbanna, atá tábhachtach do róil sa Státseirbhís agus sa tSeirbhís Phoiblí.
- Triail Phostaithrise/Breithiúnais Ócáide: Úsáidtear Triail Phostaithrise/Bhreithiúnais Ócáide chun do réasúnaíocht agus do bhreithiúnas a mheas nuair a chuirtear cásanna a bhaineann leis an obair os do chomhair. Uaireanta, tugtar sleachta téacs duit agus, ansin, sraith beart, agus iarrfar ort na bearta a rátáil. De rogha air sin, is féidir go mbainfear úsáid as leagan amach a bhaineann le teachtaireachtaí meandracha ina n-iarrfar ort gach teachtaireacht a fhreagairt trí rogha amháin, as trí cinn, a roghnú.
Céim 3: Measúnú Scileanna
Úsáidtear measúnuithe scileanna chun measúnú a dhéanamh ar an gcaoi a n-éiríonn le hiarrthóirí nuair a chuirtear tasc oibre os a gcomhair, m.sh. cur i láthair a dhéanamh, páirt a ghlacadh i gcleachtadh grúpa, cleachtadh meán, sampla oibre a chur ar fáil, tabhairt faoi Mheasunú Eolais Speisialtachta nó páirt a ghlacadh i gcleachtadh E-tray. Is féidir go gcuirfear na measúnuithe seo ar siúl mar chéim ar leith nó is féidir go ndéanfar iad mar chuid de na hagallaimh ag céim dheiridh an phróisis.
- E-tray / Postaithris: Is cleachtadh postaithrise ar ríomhaire é an E-Tray. Cuireann an E-tray cás réadúil oifige os chomhair an iarrthóra ina gcaithfidh siad cáipéisí a léamh, tascanna a dhéanamh agus ríomhphoist a fhreagairt.
- Measúnú Grúpa agus Rólimirt: I measúnú grúpa, déanann an t-iarrthóir obair le hiarrthóirí eile chun cás áirithe a bhaineann leis an obair a mheas, agus déantar ar líne nó aghaidh ar aghaidh iad agus uaireanta bíonn orthu cur i láthair a dhéanamh nó tuairisc a chur ar fáil. Maidir le rólimrt, tabharfar treoracha áirithe don iarrthóir agus iarrfar orthu dul i dteagmháil le duine amháin, nó níos mó daoine, agus déanann measúnóirí an teagmháil seo a mheas.
- Cleachtadh Meán: Is féidir cleachtadh meán a úsáid mar chuid den chéim mheasúnaithe más cuí. De ghnáth, baineann sé seo le róil shinsearacha nó le róil ina mbeidh teagmháil leis na meáin riachtanach.
- Cur i Láthair: Is minic a iarrtar ar Iarrthóirí ar róil Ghairmiúla, Theicniúla, Chomhairleachta nó róil do Chéimithe cur i láthair a dhéanamh mar chuid de chéim an agallaimh sa phróiseas roghnaithe. Is féidir go dtabharfar ceist nó topaic d’iarrthóirí agus beidh orthu taighde a dhéanamh uirthu agus cur i láthair a chur le chéile bunaithe uirthi agus, ansin, an cur i láthair a dhéanamh do Bhaill an Bhoird mar chuid den agallamh.
- Sampla Oibre: Maidir le roinnt ról Gairmiúil, Teicniúil agus Bainistíochta, is féidir go n-iarrfar ar iarrthóirí samplaí dá n-obair a chur ar fáil, m.sh. is féidir go gcuirfear portfóilió nó tasc ar fáil agus go n-iarrfar ar an iarrthóir é a chomhlíonadh agus a chur isteach laistigh de thréimhse ama ar leith.
- Ceistneoir Pearsantachta: Is féidir go ndéanfar ceistneoir pearsantachta roimh agallamh, do róil shinsearacha de ghnáth.
Céim 4: Agallamh
Baintear úsáid as agallaimh inár bpróisis earcaíochta agus roghnaithe uilig. Tabharfar na sonraí cuí d’iarrthóirí roimh a n-agallamh, m.sh. ainmneacha Bhaill an Bhoird Agallaimh, leagan amach an agallaimh (m.sh. ar líne nó aghaidh ar aghaidh) agus na réimsí a ndéanfar meaúnú orthu.
Is féidir go gcuirfear iarrthóirí faoi agallamh agus go ndéanfar measúnú orthu bunaithe ar Chóras Inniúlachta na Státseirbhíse nó ar an gCreat Inniúlachta. Tá tuilleadh eolais faoin gcaoi ar féidir ullmhúchán a dhéanamh d’agallamh trí úsáid a bhaint as an dá chur chuige seo ar fáil ar an leathanach dar teideal Comhairle faoi Agallaimh. Cuirfear in iúl d’iarrthóirí cén córas, an Córas Inniúlachta nó an Creat Inniúlachta nó modh/córas eile, a bheidh in úsáid roimh ré.
Léiríonn na hinniúlachtaí nó na réimsí cumais na príomhriachtanais a aithníodh mar riachtanais atá ag teastáil chun feidhmiú go héifeachtach sa Státseirbhís agus sa tSeirbhís Phoiblí agus cuirfear ceisteanna ar iarrthóirí agus déanfar measúnú orthu bunaithe ar na hinniúlachtaí agus na réimsí cumais sin le linn an agallaimh.
Samplaí de na hinniúlachtaí:Fadhbanna a Réiteach, Obair Foirne, Cinntí a Dhéanamh, agus Foirne a Stiúradh, mar aon le hinniúlachtaí eile.
Samplaí de réimsí cumais: Dírithe ar Chúrsaí Digiteacha, Nuálaíocht, Treoir agus Cumhacht a Thabhairt, agus Comhoibriú, mar aon le réimsí eile.
Maidir le comórtais ina mbíonn líon mór iarratas, is féidir go rachaidh iarrthóirí ar aghaidh chuig céim an agallaimh i ‘ngrúpaí’. De ghnáth, tabharfar cuireadh do na hiarrthóirí a fuair na marcanna is airde sna céimeanna roimhe sin (m.sh. sna measúnuithe ar líne agus a ghearrliostú) cuireadh chun agallaimh sa chéad ghrúpa. Is féidir go gcuirfear cuireadh chun agallaimh do ghrúpaí breise, de réir mar a thagann an t-éileamh chun cinn.
Ag brath ar an gcineál róil ar chuir tú isteach air, is féidir go mbeidh ort aon cheann de na cineálacha agallaimh seo a leanas a dhéanamh.
- Réamhagallamh: Is féidir go dtabharfar cuireadh d’iarrthóirí chuig réamhagallamh, ina ndéantar scrúdú ar a scileanna, ar a dtaithí, ar a gcumas nó agus ar a n-inniúlachtaí, ag baint úsáid as critéir a aithníodh mar chritéir riachtanacha chun feidhmiú go héifeachtach sa ról cuí. Iarrfar ar iarrthóirí fianaise dena n-inniúlacht/gcumas a léiriú trí cheisteanna a fhreagairt agus shamplaí a thabhairt de chásanna inar léirigh siad inniúlacht/cumas sna réimsí cuí. Tabharfar marcanna d’iarrthóirí bunaithe ar a n-inniúlacht/gcumas i ngach réimse agus cuirtear na hiarrthóirí sin a bhaineann an caighdeán cuí amach in ord fiúntais, chun a shocrú an rachaidh siad ar aghaidh chuig céim an agallaimh dheiridh agus/nó an roghnófar do cheapachán i bpost iad. Is féidir go mbeidh Físagallamh Uathoibrithe, Físagallamh Beo nó Agallamh aghaidh ar aghaidh i gceist. Cliceáil ar an nasc chuig an leathanach ar a bhfuil Comhairle faoi Iarratais chun tuilleadh eolais a fháil.
- Agallamh Deiridh: Le linn an agallaimh dheiridh, déanfar measúnú breise ar iarrthóirí bunaithe ar a scileanna, a dtaithí agus a n-inniúlachtaí nó a gcumas maidir leis na critéir a ndéantar cur síos orthu i leabhrán eolais an chomórtais. Déantar gach iarrthóir a mheas sna réimsí céanna chun a chinntiú go bhfuil cothromaíocht chun tosaigh sa phróiseas roghnaithe. Maidir le róil shinsearacha agus ghairmiúla, déanfar iarrthóirí a mheas maidir lena gcumas dul i ngleic le príomhdhúshláin straitéiseacha a bhaineann leis an ról. Is féidir go mbeidh Físagallamh Beo nó Agallamh aghaidh ar aghaidh i gceist ag céim an agallaimh dheiridh. Cuirfidh painéal saineolaithe ceisteanna éagsúla ort chun cabhrú leat do scileanna agus do thaithí a léiriú, agus chun a shocrú an mbeifeá i d’iarrthóir oiriúnach don ról. Cliceáil ar an nasc chuig an leathanach ar a bhfuil Comhairle faoi Iarratais chun tuilleadh eolais a fháil.
Céim 5: Seiceálacha réamhfhostaíochta agus Imréitigh
Má chuirtear faoi mheas thú do ról, is féidir go rachaidh tú ar aghaidh chuig an gcéim imréitigh agus déanfar seiceálacha deiridh cáilitheachta agus réamhfhostaíochta. Maidir le róil áirithe, beidh seiceálacha slándála sa bhreis ag teastáil.
Imréiteach: Ní mór d’iarrthóirí gach cáipéis riachtanach a chur ar fáil do publicjobs.ie, lena n-áirítear foirmeacha a eisíodh, laistigh den tréimhse a shonraítear. Ba chóir féachaint ar Leabhrán Eolais an Chomórtais chun eolas a fháil faoi chomórtas ar leith. Is féidir go mbeidh an t-eolas agus na cáipéisí seo a leanas san áireamh:
- Cruthúntas ar Sheoladh Baile
- Pas/Teastas Breithe
- Cáilíochtaí Acadúla a bhaineann leis an bpost
- Nochtadh ó na póilíní faoi áit ar bith ina raibh cónaí ar an iarrthóir ar feadh sé mhí nó níos mó taobh amuigh d’Oileán na hÉireann ó bhí siad 16 bliana d’aois nó níos sine.
- Ainm agus sonraí teagmhála (seoladh ríomhphoist agus uimhir ghutháin) d’fhostóra reatha (ní dhéanfaimid teagmháil le d’fhostóir reatha gan do chead agus ní go gcríochnófar gach fiosrú eile)
- Ainm agus sonraí teagmhála (seoladh ríomhphoist agus uimhir ghutháin) an(na) fhostóra(bhfostóirí) a bhí agat roimhe seo.
- Cuireadh sínithe chun Foirm Ríomhghrinnfhiosrúcháin an Gharda Síochána a líonadh isteach
- Foirm Féindhearbhaithe Sláinte agus Carachtair - foirm shínithe
- Is féidir go mbeidh ar an iarrthóir measúnú a léiríonn go bhfuil siad in ann tabhairt faoin obair, ó thaobh na sláinte de, a dhéanamh le hOifig an Phríomhoifigigh Leighis.
- Seans go mbeidh triail éisteachta/súl ag teastáil
- Seans go mbeidh ceadúnas tiomána glán ag teastáil
- Seans go n-iarrfar ort tréimhsí dífhostaíochta a dheimhniú
Tuilleadh Eolais
Chun tuilleadh eolais a fháil, téigh go dtí an leathanach ar a bhfuil Ceisteanna Coitianta agus chun teacht ar nodanna agus eolas praiticiúil faoin gcaoi ar féidir leat ullmhúchán a dhéanamh do na céimeanna éagsúla den phróiseas earcaíochta, téigh go dtí na míreanna faoi Iarratais, Thrialacha agus Agallaimh thíos.
Más mian leat dul i dteagmháil linn, is féidir leat é sin a dhéanamh trí úsáid a bhaint as na roghanna atá ar fáil ar an leathanach dar teideal Téigh i dTeagmháil Linn.
